Om skuld te gebruik om welvaart te verhoog, staan as hefboomfinansiering bekend. Dit werk so: ‘n Mens leen geld om ‘n bate aan te skaf met die oogmerk dat dit in waarde toeneem. Daarna kry jy  iemand anders om die lening af te betaal.

Gestel ‘n mens koop ‘n woonstel ter waarde van R800 000. Jy kan R800 000 kontant vir die woonstel betaal, ‘n huurinkomste ontvang en geduldig wag dat inflasie die waarde van jou belegging verhoog. Óf jy kan die geld leen, en die woonstel dan verhuur en die verband met die huurgeld afbetaal.

As ‘n mens kontant betaal, word die opbrengskoers op die R800 000 uitgewerk. Betaal jy R80 000 deposito, maar leen die oorblywende gedeelte, word die opbrengs op die R80 000-belegging uitgereken. Die waarde van die woonstel sal aan die einde van die beleggingstermyn in beide gevalle identies wees, maar omdat jy by die lening ‘n kleiner bedrag belê het, sal die opbrengs aansienlik hoër wees – die kleiner belegging moet teen ‘n hoër koers styg om by dieselfde eindbedrag uit te kom.

Teen ‘n eiendomsinflasiekoers van 10%, sal die waarde van die woonstel na 20 jaar ongeveer R5.38 miljoen wees. Oor die 20 jaar het die waarde van die belegging dus met 572% gestyg. Ingeval ‘n R80 000 deposito betaal is, en die verband na 20 jaar afbetaal is, sal die waarde van die belegging dieselfde wees as waar dit kontant afbetaal is. Die opbrengskoers word egter nou op die R80 000 bereken en nie op die R800 000 van die koopprys nie. Dit beteken dat ‘n hoër opbrengskoers nodig is om die kleiner bedrag tot R5,38 miljoen te laat groei. In hierdie geval het hefboomfinansiering die opbrengskoers tot R5 660% verhoog!

Voordat ‘n mens egter in eiendom belê, moet jy genoeg van die onderwerp weet om seker te wees dat jy ‘n winskoop koop of ten minste ‘n billike waarde betaal. ‘n Maatstaf vir goeie waarde is as die eiendom maandeliks vir een persent of meer van die waarde daarvan verhuur kan word. ‘n Eiendom wat R800 000 kos, moet volgens hierdie maatstaf dus vir R8 000 of meer per maand verhuur word.